Opningstale — *Det var mange blide ansikt og nærare eit opp mot femtitals gjestar til stades då Sognenett IT offisielt opna sitt nye bedriftssenter i Sogndal sentrum, tysdag 7. mai.*

- Det er lov å kjenna seg litt stolt på ein dag som dette, når ein står her midt i eit flunkande nytt bedriftssenter som er lett tilgjengeleg for kunden. Me har mykje moro å sjå fram til, seier dagleg leiar av Sognenett IT Tore Bø.

Til applaus frå dei frammøtte klipte han, saman med konserndirektør for digitale tenester i Sognekraft Ole Petter Hatlevoll, nettverkskabelen (!) som markerte starten på eit nytt og spanande kapittel for Sognenett IT. Sjå biletegalleri frå opninga nedst i saka.

*Eit kreativt alternativ til den vanlege snora vart nytta under markeringa.*

- Det er verkeleg ein glede å få vera med å opna dette nye bedriftssenteret. Visjonen om å vera Drivkraft i Sogn står sterkt i ryggen gjennom heile Sognekraft-konsernet og med Sognenett IT ønskjer me å bidra med å sikra kompetanse og sørga for at den digitale framtida skyt fart i regionen, seier Hatlevoll.

Ønskjer velkommen innom

Etter månader med oppussing var det nemleg tysdag endeleg klar for offisiell markering av det nye bedriftssenteret i Parkvegen 5. Frå kontoret i Sogndal vil i 4-5 tilsette vera stasjonert, retta mot å nå raskt og effektivt ut til kunden.

*Dagleg leiar Tore Bø (heilt til høgre på biletet i god drøs), er glad for å kunne ønske kundar velkommen til bedriftssenteret i Parkvegen 5.*

- Her i Parkvegen 5 ligg me sentralt og godt plassert med nærleik til kundane midt i hjarta av i Sogndal sentrum. Me ønskjer at folk i Sogndal skal merka at me er til stades, og kundar er hjarteleg velkomne innom anten om ein treng hjelp til noko, eller om ein berre ønskjer å slå av ein prat over ein kopp kaffi, slår Bø fast.

Ein av dei som allereie har funne seg godt til rette i det flotte lokalet er IT-konsulent Martin Svendsen. Han er svært nøgd med sitt nye arbeidskontor.

*IT-konsulent Martin Svendsen er nøgd med det nye kontoret, og stolt av å vera ein del av ei ambisiøs IT-satsing i Sogn.*

- Det er eit veldig fint og innbydande lokale, med praktiske løysingar med tanke på open kontorlandskap og møterom. Det er veldig stas å få vera ein del av denne satsinga, og kanskje ekstra stas akkurat i dag når me kan visa dette fram, seier ein stolt Svendsen.

God og rask service

Sidan oppstarten av selskapet tidleg i fjor har mykje skjedd for IT-selskapet som også tidlegare har opna eit nyoppussa lokale i Gaupne. Til saman driftar Sognenett IT frå tre ulike lokasjonar når ein tek med lokalet i Vik sentrum. Nyleg vart det også investert i tre heilelektriske bilar – noko som igjen gjer at ein kjem endå raskare ut til kunden.

*Ingen opningsfest utan noko godt å drikke og eta på. Den relativt store og flotte kaka vart fortært raskare enn ein skulle tru.*

- Sognenett IT er no til stades tett på lokalsamfunna i Sogn, og kundane skal få merke fordelane av dette. Me gler oss til å yta god og rask service i åra som kjem, avsluttar Bø.

Sjå biletegalleri frå opninga: